وجبات طازجة لبطون صغيرة
للرضّع.للأطفال.للذوّاقة.

حنا حمد ولجين. بنتنا توها كملت ١٦ شهر، وما عندنا خدّامة ولا طبّاخ ولا يدّة تمر علينا بمجبوس يوم الثلاثاء. بس حنا.

لمّا بدت تاكل على عمر ٦ شهور، قلنا بتكون سالفة حلوة. وكانت، لمدة أسبوع. بعدها صارت شغلة ثانية. تهرس بطاطا حلوة الساعة ١٠ بالليل. تدوّر بقوقل "الرضيع ياكل حمص؟" نص الليل. وتنظّف أفوكادو ناشف من السقف (لين الحين ما ندري كيف وصل هناك).

سألنا ربعنا اللي عندهم أطفال. كلهم بنفس الدوّامة: تقضي ساعة تحضّر أكل طفلك يرميه على الأرض، تحس بالذنب على القيمة الغذائية، وتعيد نفس الشي باجر. بعضهم يطلبون أكل أطفال مستورد أونلاين، أشياء مصنّعة من شهور بمصنع بأوروبا. وبعضهم استسلموا وصاروا يخلطون أي شي العيلة تاكله.

كنّا نقول لبعض نفس الشي: ليش هالشي مو موجود بالكويت؟ خدمة تريّحك. وجبات طازجة، مطبوخة نفس الصباح من ناس يعرفون شنو المفروض طفل عمره ٩ شهور ياكل، توصلك البيت قبل ما تشرب قهوتك.

نمّي خدمة توصيل وجبات يومية للأطفال من ٦ شهور إلى ٥ سنوات. أخصائي تغذية أطفال يبني كل قائمة. مطبخ مرخّص في الكويت يطبخ كل شي طازج كل صباح. ونوصّلك قبل ٨ الصبح.